សម្តេចតេជោ ហ៊ុន សែន បានប្រកាសថា «ព្រឹត្តិការណ៍សហគមន៍ ២៨វិច្ឆិកា» ដែលជាករណីនៃការចម្លងចូលសហគមន៍ដំបូងនៅកម្ពុជា គ្រប់គ្រងបានហើយ តែមិនទាន់បញ្ចប់នោះទេ
(ភ្នំពេញ)៖ ថ្លែងនៅក្នុងនាឱកាសផ្ញើសារជូនជនរួមជាតិពាក់ព័ន្ធនឹងស្ថានភាពជំងឺកូវីដ១៩ និងការទិញវ៉ាក់សាំងជំងឺកូវីដ១៩ នៅព្រឹកថ្ងៃទី ១៥ ខែធ្នូ ឆ្នាំ២០២០នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា «ព្រឹត្តិការណ៍សហគមន៍ ២៨វិច្ឆិកា» ដែលជាករណីនៃការចម្លងចូលសហគមន៍ដំបូងនៅកម្ពុជា គ្រប់គ្រងបានហើយ តែមិនទាន់បញ្ចប់នោះទេ ព្រោះការបន្តស្រាវជ្រាវរកអ្នកពាក់ព័ន្ធនៅបន្តដំណើរការនៅបណ្តាខេត្តមួយចំនួន ។
ជាមួយគ្នានោះ សម្តេចតេជោ បានបន្តថា «ព្រឹត្តិការណ៍សហគមន៍ ២៨ វិច្ឆិកា» គឺជាព្រឹត្តិការណ៍ដែលខុសគ្នាពីព្រឹត្តិការណ៍ ៣ វិច្ឆិកា ព្រោះព្រឹត្តិការណ៍សហគមន៍ ២៨វិច្ឆិកា គឺជាព្រឹត្តិការណ៍ធ្ងន់ធ្ងរខ្លាំងសម្រាប់កម្ពុជាដែលគិតមកដល់ព្រឹកថ្ងៃទី ១៥ ខែធ្នូ គឺរកឃើញអ្នកឆ្លងសរុបដល់ ៤១ នាក់ នៃករណីវិជ្ជមានកូវីដសរុបទូទាំងប្រទេសចំនួន ៣៦២ ករណី ។
គួរបញ្ជាក់ផងដែរថា រហូតមកដល់ពេលនេះ ក្រសួងសុខាភិបាល បានរកឃើញអ្នកឆ្លងវីរុសកូវីដ១៩សរុប ៣៦២ករណី ក្នុងនោះអ្នកជំងឺ៣១២ បានជាសះស្បើយ។
ដោយឡែកអ្នកជំងឺដែលនៅសល់ កំពុងដាក់ឲ្យសម្រាកព្យាបាលមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ និង មជ្ឈមណ្ឌលជាតិប្រយុទ្ធនឹងជំងឺរបេង និងហង់សិន រាជធានីភ្នំពេញ។
តាមក្រសួងសុខាភិបាល គិតត្រឹមព្រឹកនេះ «ព្រឹត្តិការណ៌សហគមន៌ ២៨វិច្ឆិកា» រកឃើញមានអ្នកឆ្លង សរុប ៤១នាក់ហើយ៕
