ប្រទេសកម្ពុជានឹងមានភ្លៀងធ្លាក់ពីបង្គួរទៅច្រើន ដោយទទួលឥទ្ធិពលពីព្យុះទី២១ អេតូ នាថ្ងៃទី១១ ខែវិច្ឆិកា
(ភ្នំពេញ) ៖ ក្រសួងធនធានទឹក និងឧតុនិយម បានឲ្យដឹងថា៖ ព្យុះអេតូ (ETAU) កំពុងស្ថិតនៅក្នុងសមុទ្រចិនខាងត្បូង និងបង្កើនឥទ្ធិពលទៅជាកូនព្យុះទី ២១។ បើតាមការតាមដាន ព្យុះនេះនឹងថមថយឥទ្ធិពលទៅជាវិសម្ពាធ ពេលចូលដល់ឆ្នេរភាគខាងត្បូងប្រទេសវៀតណាម ហើយបន្ទាប់មកជាវិសម្ពាធទាបពេលចូលមកដល់ភាគខាងកើតប្រទេសកម្ពុជានៅថ្ងៃទី ១១ វិច្ឆិកា ២០២០។
យោងតាមការជូនដំណឹងរបស់ក្រសួងធនធានទឹកចាប់ពីថ្ងៃទី ១០ ដល់ ១២ វិច្ឆិកា ដែលអង្គភាពសារព័ត៌មាន ទទួលបានដោយបានបញ្ជាក់ថា៖ បណ្តារាជធានីខេត្តនៅតំបន់ខ្ពង់រាប ភាគឦសាន ខេត្តភាគខាងកើតជាប់ព្រំដែនប្រទេសវៀតណាម និងខេត្តភាគខាងត្បូងអាចមានកម្រិតភ្លៀងខ្យល់ពីបង្គួរទៅច្រើន។ បណ្តាខេត្តនៅតំបន់មាត់សមុទ្រ នឹងអាចមានភ្លៀងខ្យល់ពីកម្រិតតិចទៅបង្គួរ និងរលកសមុទ្រមានកម្ពស់មធ្យម៕