ក្រសួងសុខាភិបាល បានចេញសេចក្តីជូនព័ត៌មានថា មានករណីវិជ្ជមានវីរុសកូវីដ-១៩ថ្មី ១នាក់ និងមិនមានអ្នកជាសះស្បើយ!
(ភ្នំពេញ)៖ នាព្រឹកថ្ងៃទី១១ ខែវិច្ឆិកា ឆ្នាំ២០២០នេះ ក្រសួងសុខាភិបាល បានចេញសេចក្តីជូនព័ត៌មានថា មានករណីវិជ្ជមានវីរុសកូវីដ-១៩ថ្មី ១នាក់ និងមិនមានអ្នកជាសះស្បើយនោះទេ។
សូមបញ្ជាក់ផងដែរថា ករណីវិជ្ជមានថ្មី គឺជាស្ត្រីជនជាតិអាមេរិកកាំអាយុ ៣៥ ឆ្នាំស្នាក់នៅណ្ឋាគារមួយក្នុងរាជធានីភ្នំពេញ។
ស្ត្រីខាងលើបានធ្វើដំណើរមកពីសហរដ្ឋអាមេរិក និងបន្តជើងហោះហើរនៅប្រទេសកូរ៉េខាងត្បូង ដោយមកដល់កម្ពុជានៅថ្ងៃទី ០៤ ខែវិច្ឆិកាឆ្នាំ ២០២០។
ក្រសួងបានបញ្ជាក់ថា លទ្ធផលធ្វើតេស្តវត្ថុសំណាកលើកទី ២ នៅថ្ងៃទី ៧ នៃការធ្វើចត្តាឡីស័ករបស់បុគ្គលនេះ គឺវិជ្ជមានវីរុសកូវីដ-១៩ ដែលផ្តល់ដោយមន្ទីរពេទ្យមិត្តភាពខ្មែរ-សូវៀតរាជធានីភ្នំពេញ។ បច្ចុប្បន្នអ្នកជំងឺត្រូវបាន ដាក់ឲ្យ សម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
គួរបញ្ជាក់ផងដែរថា រហូតមកដល់ពេលនេះ ក្រសួងសុខាភិបាល បានរកឃើញអ្នកឆ្លងវីរុសកូវី១៩សរុប ៣០១ករណី ក្នុងនោះអ្នកជំងឺ២៨៨ បានជាសះស្បើយ ។
ដោយឡែកអ្នកជំងឺ ដែលនៅសល់ កំពុងដាក់ឲ្យសម្រាកព្យាបាលនៅ មន្ទីរពេទ្យមិត្តភាពខ្មែរ-សូវៀត៕