បរទេស៖ ជម្លោះសង្គ្រាមស៊ីវិល រវាងកងទ័ពរដ្ឋាភិបាល នៃប្រទេសអេត្យូពី (Ethiopia) និង ក្រុមគណបក្សសេរីភាពប្រជាជននៃតំបន់ Tigray (TPLF) ស្ថិតនៅភាគពាយ័ព្យ កំពុងពើបប្រយុទ្ធគ្នាយ៉ាងស្រួចស្រាវ។
បណ្តាញផ្សព្វផ្សាយរបស់រដ្ឋាភិបាល រាយការណ៍ថា កងទ័ពជាតិ បានឈ្នះកងកម្លាំងផ្តាច់ខ្លួន ជាបន្តបន្ទាប់ ហើយកំពុងបន្តដំណើរសំដៅទៅកាន់ទីក្រុង មេកកេល (Mekelle) ដែលជាទីចុងក្រោយរបស់ក្រុមឧទ្ទាមផ្តាច់ខ្លួន Tigray។
សង្គ្រាមបានផ្ទុះឡើងជាង ២ សប្តាហ៍មកនេះ ដោយកងទ័ពសហព័ន្ធរដ្ឋអេត្យូពី បានវាយចូលកាន់កាប់បានជាច្រើនកន្លែង នៅតំបន់ Tigray ហើកំពុងបញ្ជូនទ័ពប្រយុទ្ធសមរភូមិជួរមុខ សំដៅទៅទីក្រុងមេកកែល។
សង្គ្រាមបានផ្ទុះឡើង តាំងពីដើមខែវិច្ឆិកា ហើយនៅថ្ងៃទី ២១ ខែវិច្ឆិកា រដ្ឋាភិបាលបានប្រកាសថាពួកគេបានគ្រប់គ្រងទីក្រុង Adigrat នៅក្នុងតំបន់ នៅក្នុងតំបន់ Tigray។ យោធាអេត្យូពីព្រមានប្រជាជនស៊ីវិល អំពីលទ្ធភាពប្រើកាំភ្លើងធំបាញ់ផ្លោងទៅលើទីក្រុង គ្រាដែលមានជនស៊ីវិលរាប់ម៉ឺននាក់ បានរត់ភៀសខ្លួនឆ្លងដែនទៅប្រទេសស៊ូដង។
ប្រព័ន្ធផ្សព្វផ្សាយព័ត៌មានធំៗ រាយការណ៍ថា គិតត្រឹមថ្ងៃទី ២២ ខែវិច្ឆិកា មានជនស៊ីវលជាង ៣ ម៉ឺននាក់ (៣២០០០) បានគេចខ្លួនទៅស៊ូដង់ ដើម្បីគេចេញពីតំបន់កំពុងប្រយុទ្ធគ្នា។
អ្នកវិភាគអន្តរជាតិមួយចំនួន មើលឃើញថា ជម្លោះកើតឡើងរវាងកងកម្លាំងរដ្ឋាភិបាល និងក្រុមប្រឆាំងផ្តាច់ខ្លួន ដោយសារមានការបែងចែកអំណាចមិនស្មើរវាង នាយករដ្ឋមន្ត្រីអេត្យូពី លោក Abiy Ahmed និងមេដឹកនាំតំបន់ Tigray លោក Debretsion Gebremichael។ លោក Abiy Ahmed និយាយថា លោកគ្រាន់តែចង់មានមានសមត្ថភាពពង្រឹងនិតិរដ្ឋក្នុងប្រទេស ហើយគ្មាននរណាអាចរំលងច្បាប់បានឡើយ។
លោកចោទប្រកាន់ថា ក្រុម Tigray បានព្យាយាមរំខានដល់ការអភិវឌ្ឍន៍ និងរដ្ឋបាលរបស់អេត្យូពី។ តំបន់ Tigray មានឥទ្ធិពលខ្លាំងនៅក្នុងប្រទេសអេត្យូពី រយៈពេលជាង ៣០ ឆ្នាំ ហើយចាប់តាំងពីឆ្នាំ ២០១៨ ពួកគេមានការបែងចែកដែនកំណត់អំណាចមិនស្មើ នៅពេលដែល លោក នាយករដ្ឋមន្ត្រី Abiy Ahmed បានឡើងកាន់អំណាច។
លោក Debretsion Gebremichael មេដឹកនាំ TPLF ប្រសិនបើយើងមិនប្រយុទ្ធការពារខ្លួន តើនឹងមានអ្វីផ្លាស់ប្តូរ ពួកគេនឹងកម្ទេចពួកយើង ដូចជាប្រជាជន។តំបន់ Tigray មានប្រជាជនប្រមាណ ៧ លាន ក្នុងចំណោមប្រជាជន អេត្យូពី ១១០ លាននាក់។
នៅពេលនេះ គេមិនទាន់មានព័ត៌មានលម្អិតជុំវិញ ការបាញ់ប្រយុទ្ធគ្នានៅឡើយ គ្រាដែលសារព័ត៌មានបរទេសមួយចំនួន រាយការណ៍ថា មានមនុស្សប្រមាណជាង ៥០០ នាក់បានស្លាប់ និងរាប់ម៉ឺននាក់បានភៀសខ្លួនចេញពីតំបន់ជម្លោះ៕