កូរ៉េខាងត្បូង និងចិន សន្យាធ្វើឲ្យប្រសើរឡើងនូវទំនាក់ទំនងទ្វេភាគី និងដោះស្រាយបញ្ហាក្នុងតំបន់និងលើពិភពលោក
(អន្តរជាតិ)៖ រដ្ឋមន្ត្រីការបរទេសនៃប្រទេសកូរ៉េខាងត្បូង និងប្រទេសចិន បានសន្យាកាលពីថ្ងៃព្រហស្បតិ្តម្សិលមិញនេះថា នឹងធ្វើការជាមួយគ្នាដើម្បីធ្វើឲ្យប្រសើរឡើងនូវទំនាក់ទំនងទ្វេភាគី និងដោះស្រាយបញ្ហានានានៅក្នុងតំបន់និងលើពិភពលោក ដូចជាការចរចានុយក្លែអ៊ែរដែលជាប់គាំងជាមួយនឹងប្រទេសកូរ៉េខាងជើង និងបញ្ហាឆ្លងរាតត្បាតនៃជំងឺកូវីដ-១៩ ជាដើម។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
រដ្ឋមន្ត្រីការបរទេសកូរ៉េខាងត្បូងអ្នកស្រី Kang Kyung-wha បានជួបពិភាក្សាជាមួយរដ្ឋមន្ត្រីការបរទេសចិនលោក Wang Yi ។ លោក Wang Yi បានធ្វើដំណើរទៅដល់ទីក្រុងសេអ៊ូល ប្រទេសកូរ៉េខាងត្បូងកាលពីថ្ងៃពុធ បន្ទាប់ពីបានចំណាយពេល ២ ថ្ងៃនៅក្នុងទីក្រុងតូក្យូ ប្រទេសជប៉ុន។
អ្នកនាំពាក្យក្រសួងការបរទេសកូរ៉េខាងត្បូងលោក Choi Young-sam បានបញ្ជាក់នៅក្នុងសន្និសីទកាសែតថា រដ្ឋមន្ត្រីការបរទេសនៃប្រទេសទាំងពីរបានពិភាក្សាគ្នា «យ៉ាងទូលំទូលាយ និងស៊ីជម្រៅ» អំពីគម្រោងដំណើរទស្សនកិច្ចរបស់ប្រធានាធិបតីចិន លោក Xi Jinping ទៅកាន់ប្រទេសកូរ៉េខាងត្បូង និងបញ្ហាផ្សេងៗទៀតពាក់ព័ន្ធនឹងផលប្រយោជន៍ទៅវិញទៅមក ។
លោក Wang Yi បានប្រាប់អ្នកស្រី Kang Kyung-wha ថា ដំណើរទស្សនកិច្ចរបស់លោក គឺដើម្បីបង្ហាញអំពីសារៈសំខាន់នៃទំនាក់ទំនងទ្វេភាគី ស្របពេលដែលប្រទេសទាំងពីរបានសហការគ្នាក្នុងនាមជា «ដៃគូយុទ្ធសាស្ត្រ» លើការការពារសន្តិភាព និងស្ថិរភាពនៅក្នុងតំបន់ និងការលើកកម្ពស់អភិបាលកិច្ចសាកលលោក ។
នៅពេលដែលអ្នកកាសែតសួរថាតើលោក Xi Jinping នឹងធ្វើទស្សនកិច្ចទៅកាន់ប្រទេសកូរ៉េខាងត្បូងនៅពេលណា លោក Wang Yi បានបញ្ជាក់ថា ភាគីទាំងពីរកំពុងសម្របសម្រួលលើ «ស្ថានការណ៍» ពាក់ព័ន្ធនឹងរឿងនេះ ដែលក្នុងនោះមានទាំងស្ថានការណ៍ទាក់ទិននឹងការឆ្លងរាលដាលនៃជំងឺកូវីដ-១៩ ផងដែរ៕
