(ភ្នំពេញ)៖ លទ្ធផលធ្វើតេស្តកូវីដ១៩លើកដំបូងនៃរដ្ឋមន្ត្រី២រូបគឺ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក កើត រិទ្ធ រដ្ឋមន្ត្រីក្រសួងយុត្តិធម៌ លទ្ធផលបង្ហាញថា អវិជ្ជមាន។
នេះបើតាមប្រភពព័ត៌មានបានឲ្យដឹងនៅមុននេះ។ ថ្នាក់ដឹកនាំទាំង២រូបនឹងត្រូវបន្តធ្វើចត្តាឡីស័ក និងធ្វើតេស្ត២ដងទៀតតាមការកំណត់របស់ក្រសួង។ លោកសូមជូនពរសុខភាពល្អ និងចៀសផុតពីការឆ្លងជំងឺកូវីដ-១៩ ទាំងអស់គ្នា!។
សូមជំរាបថា ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានហៅព្រឹត្តិការណ៍ឆ្លងជំងឺកូវីដ១៩របស់ក្រុមគ្រួសារអគ្គនាយកពន្ធនាគារគឺជារឿងធ្ងន់ធ្ងរណាស់ ហើយសូមប្រកាសអំពាវនាវឲ្យអ្នកពាក់ព័ន្ធផ្ទាល់ និងប្រយោល ប្រញាប់ប្រញាល់ចូលខ្លួនមកធ្វើតេស្តដើម្បីស្វែងរកមេរោគកូវីដ១៩៕