(ភ្នំពេញ)៖ នាព្រឹកថ្ងៃទី៣ ខែធ្នូ ឆ្នាំ២០២០នេះ ក្រសួងសុខាភិបាល រកឃើញមានករណីវិជ្ជមានវីរុសកូវីដ-១៩ ថ្មី ចំនួន២នាក់ ដែលជាអ្នកពាក់ព័ន្ធនឹងព្រឹត្តិការណ៌សហគមន៌ ២៨វិច្ឆិកា និងមិនមានអ្នកជាសះស្បើយនោះទេ។
សូមបញ្ជាក់ផងដែរថា ករណីឆ្លងថ្មីខាងលើ គឺជាបុរសជនជាតិខ្មែរអាយុ ២៣ ឆ្នាំមានអាសយដ្ឋានស្នាក់នៅ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាបុគ្គលិកធនាគារចិន(កាណាឌីយ៉ា ផ្លូវព្រះមុន្នីវង្ស) ដែលបានប៉ះពាល់ផ្ទាល់ ជាមួយស្ត្រីអាយុ ៣៦ឆ្នាំ ដែលបានរកឃើញវីរុសកូវីដ១៩ នាថ្ងៃទី២៩ ខែវិច្ឆិកា ឆ្នាំ២០២០។
រីអ្នកឆ្លងថ្មីម្នាក់ទៀតជាស្ត្រីជនជាតិខ្មែរ ដែលមានអាយុ ២១ ឆ្នាំមានអាសយដ្ឋានស្នាក់នៅសង្កាត់វាលស្បូវ ខណ្ឌច្បារអំពៅរាជធានីភ្នំពេញ ដែលជាបុគ្គលិកធនាគារ កាធេយូណាយធីត រាជធានីភ្នំពេញ។
បច្ចុប្បន្នអ្នកជំងឺទាំងពីរ ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតរាជធានីភ្នំពេញ។
គូបញ្ជាក់ផងដែរថា តាមក្រសួងសុខាភិបាល បានបញ្ជាក់ថា គិតត្រឹមព្រឹកនេះ «ព្រឹត្តិការណ៌សហគមន៌ ២៨វិច្ឆិកា» រកឃើញមានអ្នកឆ្លង សរុប ១៩នាក់ហើយ។
តាមក្រសួងសុខាភិបាល រហូតមកដល់ពេលនេះ បានរកឃើញអ្នកឆ្លងវីរុសកូវី១៩សរុប ៣៣១ករណី ក្នុងនោះអ្នកជំងឺ៣០៤ បានជាសះស្បើយ។
ដោយឡែកអ្នកជំងឺដែលនៅសល់ កំពុងដាក់ឲ្យសម្រាកព្យាបាលមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ រាជធានីភ្នំពេញ។
សូមអានព័ត៌មានលម្អិត ស្តីពី ករណីលើកដំបូងនៃការចម្លងចូលសហគមន៌ មានភ្ជាប់ជូនខាងក្រោមនេះ ៖